Rrezik shembje të mureve të kalasë së Gjirokastrës. –

Monument kulture, çarje dhe rrezik shembje të mureve të kalasë së Gjirokastrës. –

Një nga monumentet kulturore  më të bukura dhe më të vizituara në Shqipëri, kalaja e qytetit të Gjirokastrës ka rrezik të shembet. Si pasojë e motit të  keq muret e kalasë kanë pësuar çarje të mëdha e ka rrezikshmëri të lartë për t’u  shembur. Ish-ministri i Shëndetësisë aktualisht deputet i LSI-se, Vangjel Tavo ka denoncuar situatën publikisht nëpërmjet një shkrimi në Facebook. Në foton e publikuar duket qartë se muret e kalasë kanë pësuar carje serioze e për këtë duhen marrë masa.

“Edhe pas shumë ditësh denoncimi në media e rrjete sociale për rrezikun e shembjes së Kalasë së Gjirokastrës, nuk është marrë asnjë masë e nuk është bërë asnjë ndërhyrje. Kalaja e qytetit të Gjirokastrës ka pësuar çarje në pjesë të mëdha të murit të saj, duke rrezikuar seriozisht shembjen. Ka një rrëshqitje të një pjese shkëmbi në zonën poshtë Kullës së Sahatit, e cila vë në rrezik tërë Kalanë, monument kulture i kategorisë së parë.

Inxhinierët dhe ekspertët kanë ngritur alarmin për rrezikun që i kanoset Kalasë. Duhet menjëherë të merren masa urgjente për mbrojtjen e monumentit. Edhe me sy të lirë dallohet çarja e kullës jugore dhe lagështia në galeritë poshtë kullës së sahatit.
Disa ditë më parë rreshjet e dendura dëmtuan Urën e Llongos dhe Koshovicës. Në Zagori ura e Hoshtevës, monument kulture, u rrënua plotësisht. Monumentet e Gjirokastrës e mbarë qarkut të saj po rrënohen njëra pas tjetrës.

Kalaja është në varësi të Ministrisë së Kulturës e cila nuk ka bërë asnjë investim dhe madje nuk po merr asnjë masë për mbrojtjen e saj në këtë gjendje kritike në të cilën ndodhet.

rrezik shembje të mureve të kalasë së Gjirokastrës. –

Kalaja është identiteti i Argjirosë dhe simboli i çdo gjirokastriti. Asnjë pushtues e as Lufta e Parë dhe e Dytë Botërore nuk arritën ta rrënonin atë, por me sa duket indiferenca dhe neglizhenca e një qeverie mund t’ia dalë mbanë.

“Ra Si Yll Po Su Shua,” shkruan mjeshtri Ismail Kadare për Argjironë

“….. ja Argjiroja e shpejtë
tok me foshnjezën e vet
u vërtit si zog në erë
nga kalaja në humnerë
shkëmb më shkëmb seç u copëtua
ra si ylli po su shua
dhe kujtoi ky shkëmb i bardhë
se fëmija saj mbet gjallë
dhe që foshnjen ta mekojë
qumësht zuri të pikojë.”

Për qindra vite Argjiroja nuk është shuar nga kujtesa e popullit gjirokastrit, sepse Kalaja ka mbajtur gjallë heroizmin, legjendat, dhe historinë e këtij qyteti. Lejoni me indiferentizmin tuaj të copëtohet shkëmb më shkëmb e gurë më gurë, dhe identiteti i kësaj treve shuhet.

Ndërhyni sa më shpejtë që të mos përshkruheni në tekstet shkollore si varrmihësit e historisë.”,- shkruan Tavo.